Pendent l’estagi en Auvèrnha aguèrem l’escasença de rescontrar lo grop de musica « Traucatèrma », un escais nom per dire de qualqu’un que despassa los limits en fasent pas coma tot lo monde. Podèm far lo ligam amb lo grop « La Talvera », qu’es la broa de la vinha que vira lo tractor : « Es sus la Talvera qu’es la libertat » – J.Bodon. Es un grop trad-ròck originari de Cantal constituit de 6 musicaires e cantaires.
Se pòt ausir mantun instrument de musica, acordeon, trompeta, flaüta, trombòne, guitarra, violon, batariá, armonica mas tanben d’instruments tradicionals coma la cabreta e lo brau, una mena de tambor, fargat amb de pel, utilizat per tornar far lo crit del buòu. Sortiguèron 3 albums : « A còps de pè pel cuòu ! » sortit en 2001, « Quand n’i a pro ne’n demòra » en 2005 e « Tant que farem atau ! » en 2017.
Pendent lo rescontre lo grop nos faguèt un pichòt concèrt que i dancèrem e cantèrem, quand èra possible.
Trapèri enriquissent de veire aquela varietat d’intruments tradicionals occitans, al sens larg, que son pas los qu’ausissèm de costuma. Prenguèri fòrça plaser de dançar, borrèia, escoticha, rondèu, brisa-pè, etc suls ritmes d’aquel grop.
Marilon Ferré e la còla