Nòstre estagi « lenga e cultura » en Auvèrnha s’acabèt per la visita del Musèu de l’Agricultura Auvernhata (L’Ostal de la Marisson) situat al centre del vilatge de Còltina sul planòl de la Planesa. Esperavi pas descobrir un tal musèu dins aquel vilatjon… Per començar pòdi dire que la bastissa qu’abriga aquel luòc es subrebèla e alara que dire de l’interior ! Mas abans de ne dire mai sus la vida dels paisans d’Auvèrnha Nauta d’autres còps vos vau presentar nòstre guida plan ancorat dins la lenga auvernhata, lo sénher Rogier Charbonnel. E òc aguèrem l’astre d’aver aquela visita guidada dins la lenga del país mercé a aquel paisan retirat qu’a de tostemps parlat patés coma ditz.
Dins aquel musèu creat per l’ancian cònse de Còltina, lo sénher Josèp Boudou, descobrissèm lo quotidian d’una bòria al fial de las sasons. La visita comença sul tèma de l’ivèrn : dintram dins la pèça e descobrissèm l’estable. I trapam lo lièit del vaquièr car aquel darnier susvelhava lo cabal, viviá doncas amb sos animals. I aviá un escalièr que permetiá de pujar a la fenièra ont se trobava lo fen. Dins l’estable las vacas de raças Salers o Aubrac coabitavan amb las galinas, los pijons, los motons Bizet e los pòrcs embarrats dins la sot per l’engraissament abans de los tuar e de far « la fèsta del pòrc ». Aprèp l’ivèrn ven la prima e sas montadas dins las estivas ont se fasiá la fabricacion del celebre formatge « lo Cantal » (tota sa fabricacion i es explicada e illustrada amb lo material de l’epòca). Per contunhar la visita cal pujar a la primièra estança e descobrissèm la pèça de l’estiu amb las fenasons e las meissons (a la fauç fins a la debuta del sègle XX puèi a la dalha) e la de la tardor amb las lauradas. I son tanben mostradas las fièras d’autres còps. La visita s’acaba amb la projeccion de dos filmes pichons sus la vida paisana :
– « La fenason d’autres còps. »
– « Lo boier » e sos buòus Salers.
Per conclure, foguèt una visita rica en descobèrtas e un vertadièr moment de plaser. Cal pas esitar d’i anar amb las classas. Un grand mercé a totes per aquel retorn dins lo temps.
Aurèlia Lagarde e la còla