S’avètz enveja de far mai mofla la magia de Nadal, vaquí una activitat ideala de faire amb los enfants, o solets. Pòt èsser una decoracion de Nadal o un present. La fin d’annada se sarra e vos prepausi una recèpta non pas de cosina, mas de bricolatge. Aguèri l’escasença de faire aquela activitat amb de mainatges e foguèt fòrça agradiu.
Per fargar un polit bonòme de nèu vos cal : de blat o de ris, una cauceta blanca o de color (que monta fin al pompilh, pas la que se tira tota sola tre que tiram la cauçadura), de botons de camisa, o pampalhetas, de ficèla, de pega e de cisèls.
Per plan seguir las etapas vos podètz ajudar de las fòtos.
Per començar cal copar la cauceta en tres : la primièra partida es la que partís dels artelhs cap al dejós del talon, aquò serà lo còs, per la segonda cal copar al dessús del talon que serà l’eissarpa e la tresena lo demai que servirà per la boneta.
Dins lo tròç que servirà pel còs, anatz metre de blat o de ris, fins a mai de la mitat, lo cal poder tampar puèi. Un còp fach, anatz formar lo cap del bonòme de nèu puèi estacar lo cap amb una ficèla. Me seguissètz ? Contunham.
Anatz prene puèi lo tròç que servís d’eissarpa e lo modelar de tal biais que semble a un cercle e lo mettre en l’entorn del còl. (O podètz tanben copar en dos e lo nosar a l’entorn del còl).
Per la boneta res de complicat, cal faire un nos a la cima e lo pausar sul cap per tal que lo bas de la boneta siá lo naut de la cauceta.
Aprèp daissatz liure cors a vòstra imaginacion per faire los uèlhs e lo nas, podètz tanben metre de botons sul ventre. Se volètz apondre un teissut en plaça de l’eissarpa es possible.
Vaquí un polit bonòme de nèu per ondrar lo vòstre ostal, o ofrir per Nadal.
Marilon Ferré e la còla