Nadal apròcha, es lo moment de parlar de las tradicions…
En Occitania, abans lo Paire Nadal, existissiá la soca de Nadal ! Aquela soca es un tronc de boès per metre dins la cheminièra. Plan segur, aquel boès lo cal copar plan abans per li daissar lo temps de secar (en general es sovent lo d’un arbre frutièr mas pòt èsser tanben quicòm mai). Se bota al fuòc la nuèit del 24 de decembre. Aprèp, segon las cresenças, deu cremar fins a l’endeman matin o fins al primièr de l’an ! Plan segur, per aquò far, lo cal far cremar pauc a pauc cada jorn. Una de las cresenças vòl que las cendres pòrtan bonur, las cal doncas gardar l’annada tota. Pòdi pas dire se a l’ora d’ara aquela tradicion se fa totjorn dins los fogals occitans mas una causa es segura es qu’es totjorn presenta dins unas de nòstras Calandretas. D’efièit, podètz veire lo mai pichon e lo mai vièlh menar amassa aquela soca tot en fasent tres còps lo torn de la cort seguits dels mainatges de l’escòla. Per aver los presents, lor cal dire totes amassa la formula magica :
« Botafuòc, Cachafuòc
Que nos alegre
Que nos faga la gràcia de veire l’an que ven !
E se sèm pas mai,
Que siam pas mens ! ».
Polit Nadal e bonas fèstas a totes !
Aurèlia Lagarde e la còla