Pendent lo darnièr modul de la formacion, farguèri amb los mainatges de mairala un abecedari jos forma d’un album. Lo mièlhs es de poder trapar una letra per cadun, que faga sens pels escolans, es a dire que cal ensajar de metre la primièra letra de lor pichon nom per exemple o pels mai abelits una letra que se trapa dins lor nom de familha.
Primièra etapa de l’album, recampèrem lo material per fargar las letras. Cada dijòus, partissiam a l’òrt de l’escòla per i passar la matinada, d’aquí recampèron o recampèrem de matèria de l’òrt (fuèlhas, bastons, fials…) que podrián far mestièr per crear las letras. Puèi, cada escolan sus un fuèlh de color reprodusiguèt la letra que li foguèt atribuida amb la matèria acampada dins l’òrt. Prenguèri la fotografia de cada mainatge amb sa letra faita en bastons o en fials.
Segonda etapa, cada escolan causiguèt un autre fuèlh de color, e amb la tinta e los tampons de las letras, tamponèron lo fuèlh tot de lor letra. Calguèt plan faire mèfi que siaguèssem dins lo bon sens. Aquel fuèlh d’aquí serviguèt de fons per pegar la fotografia de cada enfant.
Las darnièras etapas foguèron lo pegatge de cada fotografia suls fons amb lor letra, e lo montatge de l’album. Per aquò faire, nos trapèrem al canton e comencèrem lo montatge. Nos rementèrem l’alfabet e cada escolan venguèt plaçar dins un fuèlh de plastic son fuèlh amb sa letra. Religuèrem puèi l’album e lo legiguèrem amassa.
Aquí d’unas fotografias del trabalh que faguèrem amb l’escòla « Lo garric » de Besièrs.
Emà Albert e la còla
