Duas setmanas a, que hasoi ua rondalejada entà descobrir las montanhas deu Malh Massibé e deu Montanhon pitadas enter la vath d’Aspa e d’Aussau en Bearn.
La velha que m’estudièi lo parcors sus un site internet : topopyrenees.com. Qu’ei de bon consultar per’mor d’i perpausar un descriptiu detalhat dab fòtos entà illustrar cada etapa de l’itinerari.
Que partii donc de Siròs, au ras de Pau direccion la vath d’Aussau. Arrivat a Vièla, que gahèi la rota qui se’n va tau còth de Maria Blanga. Que trauquèi lo vilatge de Vilhèras e que deishèi la veitura a la capèra deu Hondàas qui’s tròba a l’entrada deu platèu deu Benon. Que marchèi pendent ua òra sus ua pista com disen dinc a ua cabana aperada cabana de las Bòrdas. Au derà capsús que prengoi un sendèr e que n’avoi tà ua òra entà arribar dinc au còth d’Aran, situat a 1654 mètres d’altituda. Un còp aquiu que pujèi a man esquèrra per la crèsta dinc au « còth de Lansatté » qui’s tròba au pè deu Malh Massibé. Qu’ataquèi lavetz la darrèra pujada en passant de ròcas calcaris a palengas entau som d’aquera pica ronda de 1973 mètres. En tot espiar lo panoramà, que minjèi ua poma puish que tornèi baishar tau còth de Lòsque e que’m caló un vintenat de minutas entà pujar dinc au Pic Montanhon. D’aquiu, que s’i ved plan la cadena de las Pireneas, deu Pic deu Mieidia de Bigòrra dinc au Pic d’Anie. Que tornèi baishar dinc au còth de Lòsque puish que gahèi un aute sendèr tà la baishada. Que seguii au derà capvath la cresta de la Seda de Pan, que passèi per la cabana deus Crambòts e qu’arrecotii a la pista deu matin. Qu’arribèi a la veitura arreviscolat per aquera virada.
Quan hèi passejadas montanhòlas, que m’avisi aus noms deus arrius, de las montanhas, de las cabanas. Plan sovent, los noms balhats ad aqueths edrets n’estón pas plan pensats. Per exemple, si arreviram « la cabana de las bòrdas », que da « la cabane de la grange…. » o engüèra « Pic deu malh Massibé », « Pic du Rocher Massibé … ». Per contra, çò d’interessant qu’ei d’estudiar la toponimia qui permet de compréner lo patrimòni deu territòri. «Malh Massibé » qui a la medisha origina com ua auta montanha d’Aussau « Pambassibé » que vien deu mot « Bassibé ». Un bassibé qu’èra un endret de peisheders de on amassavan las « bassias » qui èran aulhas joenas.
Vertad qu’ei aquera montanha de Malh Massibé, dab lo sons doç penents èra la de qui calè entà qu’i alarguèssen las bassias !!
Pèir Sacaze e la còla