Quin ei podut, aqueth vilatge de 500 poblants aperat Siròs, estar conegut e arreconegut pertot capvath Bearn e Gasconha sancèra ? Au començar, qu’ei l’ahar de chic de causa…la fiertat de beròi monde, aimadors deu lor país qui’s pensavan que la canta biarnesa e poderé, per un còp, estar drin mei en davant hèita per’mor de s’ac vàler ! Meilèu que de demorar embarrada peus vilatges, peus ostaus, tròp intimista e desconsiderada, la cultura aquera qu’avè a estar alargada tà que prengosse sens a de bonas. Tirar de l’escur aqueth riquèr deu parçan ! Tad aquò, que calè ?? Be s’i sabè, shens los mejans de comunicacion de uei lo dia, que s’i cantava hèra peu Biarn, per Bigòrra e per Gasconha ! L’idea qu’èra simpla : un empont e cantadors !! En 1967, qu’avièn lo purmèr Hestau puish un detzenat d’annadas mei tard, lo vilatge qu’arcuelhó mei de 15OOO personas. Adobat que n’estó dab teatre, dança, dia entaus mainats de las escòlas. Èra tròp ? Pro totun entà har espelir lo purmèr regent caminaire en 1982, pro entà crear los Estats Generaus de la Lenga, pro entà que lo bearnés e’s tornèsse trobar la dignitat.

Lo succès de Siròs qu’estó la pròva de l’estacament deus biarnés au lor país, l’enveja de bastir amassa lo lor aviéner. Aqueth chapitèu que vadó “un endret de resisténcia cap a la banalizacion culturau, un refugi entà la lenga, un simbèu de l’esperit biarnés” com digó a l’epòca un jornalista locau. En efèit, au parat de las seradas, b’èra beròi arrepresentat l’esperit biarnés, tan sabrós, dab la soa lenga dab qui l’umor e’s mescla tan plan. Quasi cada vilatge qu’avó l’aunor de pujar suu famós empont de Siròs, de tribalhar las cançons, las votz, las melodias. En quauquas annadas los cantadors que vadón cantaires. Que s’i tirè cançons deu desbromb e que se n’escrivó mantua, jamei parescudas si Siròs n’èra estat. Qu’èra d’ara enlà un lòc d’escambi, de promocion sociau de la cultura biarnesa e gascona. Que s’i hestegè en 2018 la 50au edicion d’aqueth eveniment qui persegueish lo son camin, dab monde navèth, ideas navèras en tot arrespectar aqueth passat tan gloriós…Siròs, vilatge clau de l’arrenavida de la cultura en Bearn e dilhèu d’aulhors …

Pèir SACAZE e la còla