Adieu tot lo mond ! Avèm ja parlat d’un fum de subjèctes divèrses e variats, uèi ai decidit de cambiar un pauc. Vos vau ajudar a menar un moment per fargar una carta de Nadal en classa o tanben a l’ostal amb la vòstra familha. La carta que vos vau parlar, la vos meti en fòto per poder visualizar la causa.
Primièr, vaquí lo material que vos caldrà :
– De fuèlhs A4 cartonats : verds, bruns e daurats.
– De cisèls.
– De feutres.
– De decoracions de Nadal de pegar.
– Un poèma.
Dins un primièr temps prenètz lo vòstre fuèlh daurat, lo plegatz en dos. Lo metètz de costat. Dins un segond temps prenètz lo fuèlh verd, dessenhatz la vòstra man dessús. Prenètz los cisèls e la decopatz. Prenètz lo fuèlh brun e decopatz un rectangle que farà ofici de tronc. Sus la primièra de cobèrta pegatz lo vòstre tronc d’arbre e la man amb los dets cap al naut per fargar un sap. Al naut de la vòstra carta podètz marcar «Polit Nadal !». Ara es vengut lo temps de far de decoracions. Podètz decorar lo vòstre sap coma vos agrada. Un còp qu’es plan bèl, dubrissètz la carta e copiatz al dintre, lo poèma de vòstra causida. Ieu per exemple ai causit «Nadal es dins lo bòsc». Lo podretz trapar a la fins de mon article s’aquò vos interessa. Un còp aquò fach daissatz plaça a la vòstra imaginacion, podètz dessenhar a l’entorn del poèma per rendre vòstra carta mai personala. Se son los vòstres enfants que fan aquesta carta, lor podètz prepausar d’apondre la lista pel paire Nadal. Vaquí avètz una polida carta de Nadal de far !
Nadal es dins lo bòsc
Nadali Nadaleta
Nadal es dins lo bòsc
Se prepara per la fèsta
Carguèt son mantèl bèl
Metèt sas bòtas negras
Aprestèt totes los presents
Nadal es dins lo bòsc
Nadali Nadaleta
Amèlia Chabaud e la còla